ADN,I.P. Ermera Halo Halao Inspesaun Ba Pagamentu Rentensaun Projetu Hatmanter No Projetu Eskuadra Polisia Hatulia B
- Publika husi: Celso
- Loron: 15/Oct/2026
Ermera, 15/10/2026. Ekipa Ajénsia Dezenvolvimentu Nasionál Institutu Públiku (ADN, I.P) Munisípiu Ermera hala’o inspesaun ba pagamentu retensaun projetu ME–EPE Hatmanter no inspesaun ba projetu MI–Eskuadra Hatulia B, hodi verifika kualidade servisu no kumprimentu ba rekizitu tékniku ne’ebé determina iha kontratu.
Projetu ME–EPE Hatmanter implementa husi kompaña TELAFINOSEGRA Unipesoál Lda. Inspesaun ne’e foka ba verifikasaun ba kualidade no kondisaun servisu ne’ebé implementa, núdar parte husi prosesu avaliasaun ba pagamentu retensaun. Prosesu ne’e importante atu konfirma kumprimentu ba obrigasaun kontratual molok kontinua prosesu pagamentu, tuir prosedimentu ne’ebé vigora.
Enkuantu ne’e, projetu MI–Eskuadra Hatulia B implementa husi kompaña SWERTE PERA Unipesoál Lda. Inspesaun ba projetu ne’e iha objetivu atu avalia progresu no kondisaun servisu konstrusaun, inklui kumprimentu ba espesifikasaun téknika no padraun servisu ne’ebé determina iha kontratu.
Atividade hirak-ne’e reflete ADN, I.P nia kompromisu atu kontinua hala’o monitorizasaun no fiskalizasaun ba projetu infraestrutura públika, hodi promove kualidade servisu, transparénsia no responsabilidade iha ezekusaun projetu sira.
Esforsu ne’e importante atu asegura katak implementasaun projetu públiku hala’o tuir rekizitu tékniku no obrigasaun kontratual, atu nune’e rekursu públiku bele uza ho efisiénsia no fó benefísiu ba komunidade.
LEMA ADN
- Aprende hodi halo, halo hodi aprende;
- Haburas kreatividade no inovativo de servisu;
- Hametin principiu servisu salva an, salva superior/liders, salva instituisaun no salva nasaun;