Covalima, 14/10/2026. Ekipa Ajénsia Dezenvolvimentu Nasional Institutu Públiku (ADN, I.P) hala’o monitorizasaun no inspesaun ba projetu infraestrutura sira iha Munisípiu Covalima, ho objetivu atu asegura katak implementasaun obra sira tuir padraun tékniku, espesifikasaun kontratu no kualidade ne’ebé determina.

Iha atividade monitorizasaun ne’e, Ekipa ADN, I.P hala’o monitorizasaun ba projetu Konstrusaun Foun Eskuadra Polísia iha Tilomar, Munisípiu Covalima, ne’ebé implementa husi kompaña Winto Unipesoál Lda.

Aleinde ne’e, Ekipa ADN, I.P mós hala’o monitorizasaun ba projetu Konstrusaun Moru Hale’u Dormitóriu iha Uma Mahon Salele, Munisípiu Covalima, ne’ebé implementa husi kompaña Haburas Maukola Unipessoal Lda.

Iha atividade seluk, Ekipa ADN, I.P hamutuk ho Ekipa Mekánika no Eletrisidade ADN, I.P hala’o inspesaun pagamentu retensaun ba projetu Konstrusaun Foun Dormitóriu iha Uma Mahon Salele, Munisípiu Covalima, ne’ebé implementa husi kompaña Levi Construction Lda.

Durante inspesaun ba projetu konstrusaun dormitóriu iha Uma Mahon Salele, ekipa inspesaun identifika defeitu balun iha obra ne’ebé presiza hetan hadi’a. Tanba ne’e, ekipa fó ona rekomendasaun ba kompaña implementadór atu halo reparasaun no hadi’a defeitu sira ne’ebé identifika, molok prosesu entrega obra nian.

Rekomendasaun ne’e importante atu asegura katak obra ne’ebé entrega ba entidade benefisiária kumpre padraun kualidade no seguransa, tuir espesifikasaun téknika no obrigasaun kontratu nian.

Liuhusi atividade monitorizasaun no inspesaun ne’e, ADN, I.P kontinua hala’o nia papél iha fiskalizasaun no akompañamentu ba implementasaun projetu infraestrutura públika, ho objetivu atu asegura kualidade obra, transparénsia no responsabilidade iha utilizasaun rekursu públiku, no garante katak infraestrutura ne’ebé konstrui bele fó benefísiu ba komunidade no instituisaun utilizadór sira.