Likisá, 29/10/2026. Ekipa Ajénsia Dezenvolvimentu Nasionál, Institutu Públiku (ADN, I.P.) Munisípiu Likisá, hamutuk ho ekipa Ministériu Obras Públikas (MOP), reprezentante instituisaun núdar donu projetu no MCAE, hala'o inspesaun konjunta ba projetu konstrusaun edifísiu foun ba INDIMO, I.P), ne'ebé lokaliza iha Tíbar, Munisípiu Likisá.

Projetu konstrusaun ne'e implementa husi kompaña Banirlema Unipessoal, Lda.

Inspesaun konjunta ne'e nia objetivu mak atu verifika diretamente iha tereñu progresu ezekusaun servisu konstrusaun, kualidade servisu ne'ebé hala'o, no kumprimentu ba espesifikasaun téknika no padraun konstrusaun ne'ebé determina iha kontratu.

Liuhusi inspesaun ne'e, ekipa sira bele avalia kondisaun implementasaun projetu no identifika aspetu tékniku sira ne'ebé presiza atensaun, atu asegura katak servisu konstrusaun la'o tuir planu, prazu no rekerimentu kontratu ne'ebé aprova.

Partisipasaun ADN, I.P, MOP, donu projetu no MCAE iha inspesaun konjunta ne'e hatudu importánsia koordenasaun entre instituisaun sira iha prosesu akompañamentu no fiskalizasaun ba implementasaun projetu públiku.

ADN, I.P kontinua hala'o knaar monitorizasaun no inspesaun ba projetu dezenvolvimentu nasionál, ho objetivu atu promove kualidade servisu, kumprimentu ba padraun tékniku no utilizasaun rekursu Estadu ho responsabilidade, atu nune'e infraestrutura públika ne'ebé harii bele responde ba nesesidade instituisaun no públiku.