Lautem, 15/10/2026. Ekipa Ajénsia Dezenvolvimentu Nasionál Institutu Públiku (ADN, I.P) Munisípiu Lautém hala’o monitorizasaun ba projetu konstrusaun foun Sentru Saúde Komunitária (Community Health Center – CHC) Lore I, ne’ebé lokaliza iha Postu Administrativu Lospalos, Munisípiu Lautém.

Projetu konstrusaun ne’e implementa husi kompania Laoysau Nabilan Unipessoal, Lda. Monitorizasaun ne’e importante atu haree no avalia progresu ezekusaun servisu iha tereñu, no mós atu asegura katak implementasaun projetu tuir padraun tékniku, espesifikasaun kontratu no kualidade konstrusaun ne’ebé determina ona.

Liu husi atividade monitorizasaun ne’e, ADN, I.P hala’o ninia papél iha akompañamentu no fiskalizasaun ba implementasaun projetu infraestrutura públika, hodi promove transparénsia, responsabilidade no utilizasaun orsamentu estadu ho efisiénsia.

Iha área saúde, konstrusaun sentru saúde komunitária iha Lore I iha potensiál atu hadi’a asesu komunidade ba servisu saúde báziku, liuliu ba família sira ne’ebé hela iha área rurál no komunidade sira iha área kobertura sentru saúde nian.

ADN, I.P kontinua hala’o monitorizasaun ba projetu dezenvolvimentu iha munisípiu sira, ho objetivu atu asegura katak obra públika implementa tuir planu, prazu no padraun kualidade ne’ebé estabelese, hodi fó benefísiu ba komunidade.