Liu husi komunikadu ida-ne’e, informa ba empreza kontratór nasionál no internasionál hotu ne’ebé daudaun ne’e hala’o hela projetu konstrusaun, liuliu projetu ne’ebé uza Orsamentu Jerál Estadu (OJE) ka hetan finansiamentu hosi Governu, katak utilizasaun sementi ho marka “CONCH” tenke tuir aprovasaun no autorizasaun husi entidade téknika kompetente.

1. Simenti CONCH hosi Papua, Indonézia

Simenti marka CONCH ne’ebé hetan aprovasaun atu uza mak sementi husi fonte produsaun iha Papua, Indonézia, ho tipu sira hanesan tuirmai:

- PCC (Portland Composite Cement): Bele uza iha fatin konstrusaun tuir nesesidade téknika no espesifikasaun projetu.

- OPC Type I (Ordinary Portland Cement): Labele uza iha área tasi nian, tuir restrisaun téknika ne’ebé aplika.

2. Simenti CONCH husi Yangzhou Conch Cement Co Ltd, Jiangsu, Xina

Simenti marka CONCH husi fonte produsaun Yangzhou Conch Cement Co Ltd, Jiangsu, Xina, ho tipu:

- PPC (Portland Pozzolana Cement)

To’o agora, sementi tipu ida-ne’e seidauk hetan aprovasaun husi Laboratóriu MOP. Tanba ne’e, seidauk bele uza iha projetu konstrusaun ne’ebé finansia husi OJE ka Governu, to’o hetan aprovasaun no autorizasaun ofisiál husi entidade kompetente.

AVIZU BA EMPREZA KONTRATÓR HOTU

Ho konsiderasaun ba kualidade konstrusaun no kumprimentu ba espesifikasaun téknika projetu, husu ba empreza kontratór nasionál no internasionál hotu atu kumpre informasaun no orientasaun sira iha komunikadu ida-ne’e. Empreza sira la-bele uza sementi ne’ebé seidauk hetan aprovasaun ofisiál husi entidade kompetente iha implementasaun projetu sira ne’ebé finansia husi OJE ka Governu.

Obrigadu barak ba ita-boot sira-nia atensaun no kooperasaun atu asegura kualidade no seguransa iha implementasaun projetu konstrusaun iha Timor-Leste.