COVALIMA, 20/10/2026. Ajénsia Dezenvolvimentu Nasionál, Institutu Públiku (ADN, I.P), liuhusi ekipa téknika Munisípiu Covalima, hala’o monitorizasaun ba implementasaun projetu infraestrutura estrada no ponte iha munisípiu ne’e, hodi akompaña progresu servisu no asegura kumprimentu ba padraun tékniku no espesifikasaun kontratu.

Iha monitorizasaun ba projetu Reabilitasaun Estrada Fohorua–Leogore (Maucatar), Sta. 0+000–7+000, ekipa téknika ADN, I.P observa iha tereñu katak kompaña JLC Lda hamutuk ho Aitula, Lda hahú halo trial ba item sub-base course iha seksaun Sta. 0+000–0+500 B/S. Projetu ne’e implementa tuir númeru kontratu Tender/170/MOP-2024, ho valor kontratu US$ 3,101,895.22.

Iha atividade monitorizasaun seluk, ekipa téknika ADN, I.P hamutuk ho Ministériu Obras Públikas (MOP) ne’ebé destakadu, hala’o monitorizasaun ba projetu Emerjensia ba Ponte Haemanu, ne’ebé lokaliza iha Postu Administrativu Suai, Munisípiu Covalima. Projetu ne’e implementa husi kompaña Maualin Suai, Unipessoal, Lda ho númeru kontratu SSS/052/MOP-2024 no montante kontratu US$ 3,126,530.02. Durante inspesaun iha tereñu, ekipa identifika katak servisu gabiaun ne’ebé implementa la tuir padraun no espesifikasaun téknika ne’ebé determina. Tanba ne’e, ekipa hamutuk ho MOP orienta atu sobu parte gabiaun ne’ebé la kumpre ho rekizitu tékniku.

Aleinde ne’e, ekipa téknika ADN, I.P iha Munisípiu Covalima hala’o mós monitorizasaun ba projetu Reabilitasaun Estrada Rural Maubisse–Lorokida, Lote 1, Chainage 0+000–2+700, ne’ebé lokaliza iha Postu Administrativu Fohorem, Munisípiu Covalima. Projetu ne’e implementa husi kompaña Uchychoky, Unipessoal, Lda ho númeru kontratu MOP-EO-26030 no montante kontratu US$ 712,513.41. Durante monitorizasaun, ekipa téknika deside atu sobu servisu gabiaun ne’ebé uza ba protesaun estrada, tanba servisu ne’e la kumpre ho padraun tékniku ne’ebé determina.

Monitorizasaun ba projetu infraestrutura sira-ne’e hatudu importánsia kontrolu tékniku iha tereñu atu identifika irregularidade no garante katak servisu implementadu tuir padraun no espesifikasaun kontratu. Liuhusi atividade hirak-ne’e, ADN, I.P kontinua hala’o nia knaar iha akompañamentu no monitorizasaun ba projetu infraestrutura públika, hodi promove kualidade servisu, seguransa no durabilidade infraestrutura ne’ebé konstrui ho rekursu públiku.