Maubisse, 14/10/ 2026. Ekipa Laboratóriu Ajénsia Dezenvolvimentu Nasionál Institutu Públiku (ADN, I.P), hamutuk ho Laboratóriu Nasionál Obras, hala’o akompañamentu ba teste Field Density Test (FDT) ba material sub-base course iha Projetu Reabilitasaun Estrada Maubisse–Turiscai, Pakote IV, hosi Estasaun (Sta.) 2+430 to’o Sta. 8+200.

Teste FDT ne’e hanesan parte ida husi prosesu kontrolu kualidade obra, ho objetivu atu verifika densidade material depois kompaktasaun iha kampu, no asegura katak servisu ne’ebé hala’o kumpre espesifikasaun téknika ne’ebé define ona ba projetu.

Field Density Test (FDT) mak teste tékniku ne’ebé uza atu determina densidade material iha kampu depois prosesu kompaktasaun. Rezultadu teste ne’e kompara ho densidade mássima ne’ebé hetan husi teste laboratóriu, tuir métodu no espesifikasaun téknika ne’ebé aplika ba projetu.

Teste ne’e importante atu asegura katak material iha kamada estrada hetan kompaktasaun ne’ebé sufisiente, hodi aumenta estabilidade, suporta karga husi veíkulu sira no reduz risku deformasaun ka sedimentasaun ne’ebé bele afeta durabilidade estrada.

Sub-base course mak kamada material granulár ne’ebé instala iha leten subgrade (rai fundamentu estrada ne’ebé prepara ona) no iha kraik base course, tuir estrutura estrada ne’ebé aprova iha dezeñu projetu.

Kamada ne’e iha funsaun importante atu distribui karga husi veíkulu ba estrutura fundamentu estrada, aumenta estabilidade no ajuda proteje subgrade husi presaun no movimentu ne’ebé mosu durante utilizasaun estrada.

Tanba ne’e, seleksaun material, preparasaun, nivelamentu no kompaktasaun presiza tuir rekizitu tékniku atu garante kualidade no durabilidade infraestrutura estrada.

Akompañamentu teste FDT husi ekipa Laboratóriu ADN, I.P no Laboratóriu Nasionál Obras reprezenta parte importante husi esforsu atu asegura katak implementasaun projetu infraestrutura públika tuir padraun tékniku no espesifikasaun kontratu ne’ebé aprova ona.

Verifikasaun téknika ne’e mós ajuda identifika iha tempu apropriadu karik iha nesesidade atu halo korrisaun ba prosesu kompaktasaun, antes kontinua ba etapa konstrusaun tuirmai.

ADN, I.P kontinua hala’o nia knaar iha monitorizasaun no kontrolu kualidade obra infraestrutura públika, ho objetivu atu promove responsabilidade, transparénsia no implementasaun obra ne’ebé kumpre padraun tékniku, hodi fó benefísiu ba komunidade no dezenvolvimentu nasionál.