Ermera, 16/10/2026. Ajénsia Dezenvolvimentu Nasionál, Institutu Públiku (ADN, I.P), liuhusi ekipa téknika Munisípiu Ermera, hala’o monitorizasaun no inspesaun ba implementasaun Projetu Reabilitasaun Estrada urbana no Drenajen iha Sentrál Gleno, ne’ebé fahe ba pakote rua, ho objetivu atu asegura katak ezekusaun servisu iha tereñu kumpre padraun kualidade, dezeñu no espesifikasaun téknika, tuir termu kontratu ne’ebé estabelese ona.

Projetu rua ne’e implementa husi kompaña Shabryca Construction Unipessoal, Lda., ho montante kontratu hamutuk USD 5.855.692,28.

Pakote dahuluk, ho númeru kontratu SSS/115/MOP-2025, iha valor kontratu USD 2.640.762,61, inklui intervensaun iha seksaun 1, 2, 6, 7, 8, 9, 10, 11, 21, 22, 23, 24, 25, 26, 27, 28, 29, 30 no 31.

Enkuantu, pakote daruak, ho númeru kontratu SSS/114/MOP-2025, iha valor USD 3.214.929,67, kobre seksaun 3, 4, 5, 12, 13, 14, 15, 16, 17, 18, 19 no 20.

Durante atividade monitorizasaun, ekipa téknika ADN, I.P halo observasaun no verifikasaun direta ba servisu sira ne’ebé implementa ona, inklui konstrusaun drenajen, konstrusaun moru protesaun, preparasaun no konstrusaun dalan, servisu betãun, no ke’e no hasai kualker asfaltu tuan ne’ebé presiza troka ka reabilita.

Ba pakote dahuluk, ekipa monitoriza servisu drenajen, moru protesaun, pavimentasaun, estrutura betaun no remosaun asfaltu tuan. Enkuantu ba pakote daruak, verifikasaun foka liuliu ba konstrusaun drenajen, inklui servisu eskavasaun atu prepara fatin ba sistema drenajen.

Verifikasaun sira-ne’e importante atu haree katak servisu ne’ebé implementa iha kampu tuir dezeñu projetu, espesifikasaun téknika no rekizitu sira ne’ebé define iha dokumentu kontratu.

Bazeia ba atividade monitorizasaun, ekipa téknika ADN, I.P halo observasaun ba progresu ezekusaun no kondisaun servisu sira ne’ebé implementa ona. Ekipa mós fó orientasaun no rekomendasaun téknika ba kompaña implementadór atu kontinua asegura kualidade servisu, uza materiál ne’ebé kumpre espesifikasaun, no implementa atividade hotu-hotu tuir dezeñu no termu kontratu.

Monitorizasaun no inspesaun hanesan ne’e importante atu identifika sedu problema tékniku ne’ebé bele afeta kualidade no durabilidade infraestrutura, nune’e bele fó oportunidade ba kompaña atu halo korrijimentu nesesáriu durante prosesu konstrusaun.

Reabilitasaun estrada urbana no sistema drenajen iha Sentrál Gleno iha papél importante atu hadi’a asesu no mobilidade ba komunidade, fasilita movimentu veíkulu no ema, no ajuda hadi’a jestaun bee iha área urbana, liuliu bainhira udan boot.

Ho monitorizasaun kontinua, ADN, I.P hametin nia papél iha akompañamentu no fiskalizasaun dezenvolvimentu infraestrutura públika, atu kontribui ba implementasaun projetu sira ne’ebé kumpre padraun tékniku no responde ba nesesidade komunidade.