Bobonaro, 08/10/2026. Ajénsia Dezenvolvimentu Nasionál, Institutu Públiku (ADN,I.P), liu husi ekipa téknika iha Munisípiu Bobonaro, hala’o monitorizasaun no inspesaun iha tereñu ba implementasaun Projeitu Konstrusaun Edifísiu Foun EBC 1, 2, 3 Raifun, ne’ebé implementa husi Lesu Boro Unipesoál, Lda, ho valor kontratu hamutuk USD 350,093.27.

Atividade ne’e hala’o ho objetivu atu verifika progresu fíziku, kualidade servisu no konformidade téknika ba implementasaun projetu, inklui uza materiál konstrusaun, métodu servisu, dezeñu, espesifikasaun téknika no kondisaun kontratu ne’ebé estabelese ona.

Durante inspesaun, ekipa téknika ADN,I.P halo observasaun no verifikasaun ba servisu konstrusaun ne’ebé implementa ona, liuliu preparasaun ba estrutura besi reforsu betaun footing, inklui kontrolu ba enkoframentu no manta betaun, atu asegura katak elementu estrutura sira prepara tuir medida no rekizitu tékniku.

Husi rezultadu observasaun iha tereñu, ekipa téknika ADN,I.P identifika katak besi reforsu, enkoframentu no manta betaun ne’ebé implementa ona kumpre ho medida ne’ebé preskreve iha dezeñu no espesifikasaun téknika. Maski nune’e, antes hala’o etapa betonajen ka kolokasaun betaun, presiza halo korrresaun no taka parte enkoframentu ne’ebé sei iha kuak ka le’et, atu prevene fuga mortar ka pasta simentu durante prosesu betonajen.

Korrresaun ba enkoframentu ne’e importante tebes tanba enkoframentu iha funsaun atu fó forma ba elementu betaun no ajuda asegura katak dimensaun no geometria estrutura mantém tuir dezeñu. Se iha kuak ka le’et ne’ebé la taka ho di’ak, pasta simentu bele sai durante betonajen, ne’ebé bele afeta kompaktu no kualidade superfísie betaun, no iha situasaun balu bele afeta integridade elementu estrutura.

Monitorizasaun no inspesaun ne’e reprezenta parte ida husi mekanizmu kontrolu no garantia kualidade ADN,I.P, atu asegura katak implementasaun projetu infraestrutura públika hala’o tuir dezeñu aprova, espesifikasaun téknika, padraun kualidade no kondisaun kontratu. Mekanizmu ida-ne’e mós importante atu suporta rezultadu projetu ne’ebé seguru, resistente no apropriadu ba utilizasaun iha futuru.