Ermera, 28/10/2026. Ekipa Ajénsia Dezenvolvimentu Nasionál, Institutu Públiku (ADN, I.P) hala’o inspesaun ba projetu konstrusaun foun Rezidénsia ba médiku, moru hale’u no postu seguransa iha Suku Lihu, Munisípiu Ermera, ne’ebé kompaña BIAMALI Unipesoál Lda mak implementa.

Inspesaun ne’e nia objetivu mak atu verifika diretamente iha tereñu kualidade no progresu servisu konstrusaun, hodi asegura katak implementasaun projetu tuir dezeñu tékniku, espesifikasaun kontratu no padraun kualidade ne’ebé estabelese.

Liuhusi inspesaun ne’e, ADN, I.P hala’o nia knaar atu akompaña no kontrola implementasaun projetu infraestrutura públika, hodi asegura katak servisu konstrusaun hala’o tuir rekizitu tékniku no promove uza rekursu Estadu ho responsabilidade.

Projetu konstrusaun rezidensia ba médiku, moru hale’u no postu seguransa ne’e espera atu kontribui ba hadi’a kondisaun servisu no seguransa ba pesoál saúde, nune’e mós suporta prestasaun servisu saúde ba komunidade iha Suku Lihu no área sira iha nia sorin.

ADN, I.P kontinua hala’o inspesaun no monitorizasaun ba projetu infraestrutura públika iha munisípiu sira, ho objetivu atu promove kualidade, kumprimentu padraun tékniku no responsabilidade iha implementasaun projetu dezenvolvimentu nasionál.