Bobonaro, 23/10/ 2026. Ajénsia Dezenvolvimentu Nasionál, Institutu Públiku (ADN, I.P), liuhusi ekipa inspesaun iha Munisípiu Bobonaro, hala’o inspesaun ba projetu konstrusaun Edifísiu Eskuadra PNTL iha Balibo, ne’ebé implementa husi kompaña Fantija Unipessoal, Lda, no projetu konstrusaun Edifísiu UPF iha Batugade, ne’ebé implementa husi kompaña Leo Hara Unipessoal, Lda.

Durante inspesaun ba projetu konstrusaun Edifísiu Eskuadra PNTL iha Balibo, ekipa ADN, I.P identifika nesesidade atu halo verifikasaun fali ba servisu armadura besi no instalasaun armaje forma betonajen antes hala’o betonajen ba viga ligasaun. Tanba ne’e, ekipa rekomenda ba kompaña atu halo verifikasaun téknika ba elementu hirak-ne’e antes hahú prosesu betonajen. Kompaña mós tenke haruka karta notifikasaun ba Laboratóriu ADN, I.P no Ministériu Obras Públikas (MOP), atu nune’e entidade sira bele akompaña no halo kontrolu tékniku iha tereñu durante prosesu betonajen.

Durante inspesaun ba projetu konstrusaun Edifísiu UPF iha Batugade, ekipa ADN, I.P rekomenda ba kompaña atu kontinua halo koordenasaun ho na’in projetu atu hetan aprovasaun ba lista materiál ne’ebé sei uza ba instalasaun, no asegura katak instalasaun sistema ar-kondisionadu ba kada unidade edifísiu hala’o tuir planu no espesifikasaun téknika projetu nian.

Inspesaun ba projetu rua-ne’e nia objetivu mak atu asegura katak implementasaun obra sira tuir prosedimentu tékniku, espesifikasaun kontratuál no padraun kualidade ne’ebé determina, hodi garante kualidade no durabilidade infraestrutura públika.