ADN,I.P. No IGEAD,I.P. HALAO INSPESAUN NO FOTI AMOSTRA BETAUN 25 MPA BA KOLUNA IHA PROJETU VEDASAUN IGEAD,I.P. IHA BAUCAU
- Publika husi: Celso
- Loron: 27/Oct/2026
Baucau, 27/10/ 2026. Ekipa Ajénsia Dezenvolvimentu Nasionál, Institutu Públiku (ADN, I.P) Munisípiu Baucau, hamutuk ho tékniku Laboratóriu ADN, I.P no mós IGEADI, I.P ne’ebé núdar nain ba projetu hamutuk hala'o inspesaun no foti amostra betaun ho rezisténsia ne'ebé espesifika 25 MPa ba elementu koluna iha projetu Konstrusaun Foun ba Vedasaun IGEADI, I.P Triloka, Baucau, Projetu ne'e implementa husi kompaña Alefrans Unipessoal, Lda.
Atividade ne'e nia objetivu mak atu verifika kualidade betaun ne'ebé uza ba konstrusaun koluna, liu husi foti amostra hodi lori ba laboratóriu atu halo teste rezisténsia komprensaun. Teste ne'e importante atu determina betaun ne'ebé uza iha konstrusaun kumpre ka lae ho rezisténsia 25 MPa, tuir espesifikasaun téknika ne'ebé determina iha projetu.
Inspesaun no teste laboratóriu ne'e mós iha objetivu atu apoia prosesu kontrolu kualidade servisu konstrusaun, asegura kumprimentu ba rekerimentu tékniku no kontratu, no fó baze téknika ba avaliasaun kualidade betaun ne'ebé uza iha projetu.
ADN, I.P liuhusi nia ekipa téknika no laboratóriu, kontinua hala'o monitorizasaun, inspesaun no teste tékniku ba projetu infraestrutura atu promove kualidade konstrusaun, kumprimentu ba espesifikasaun téknika no durabilidade infraestrutura públika iha territóriu nasionál.
Rezultadu final kona-ba rezisténsia betaun sei determina bazeia ba teste laboratóriu, atu konfirma kumprimentu ho rezisténsia ne'ebé espesifika iha projetu.
LEMA ADN
- Aprende hodi halo, halo hodi aprende;
- Haburas kreatividade no inovativo de servisu;
- Hametin principiu servisu salva an, salva superior/liders, salva instituisaun no salva nasaun;