Bobonaro,29/10/2026. Ajénsia Dezenvolvimentu Nasionál, Institutu Públiku (ADN, I.P), hamutuk ho Enjeñeru destakadu husi DNE, Ministériu Edukasaun (ME), hala’o inspesaun konjunta ba projetu konstrusaun foun moru hale’u Eskola Sekundária Téknika Vokasionál (ESTV) Malibaca, iha Munisípiu Bobonaro. Projetu ne’e implementa husi kompaña Bob’Veni Unipesoál Lda.

Inspesaun ne’e nia objetivu mak atu verifika progresu no kualidade obra, inklui kumprimentu ba espesifikasaun téknika no kuantidade servisu tuir Lista Kuantidade (BOQ), molok prosesu pagamentu finál.

Durante inspesaun iha tereñu, ekipa konjunta identifika katak iha parte balun husi moru hale'u ne’ebé estraga no presiza reparasaun. Aleinde ne’e, parte ne’ebé hetan ferrujen presiza hetan tratamentu no pintura foun atu hadi’a nia kondisaun no proteje estrutura husi korrozaun.

Ekipa konjunta mós observa katak servisu aterru rai nian seidauk kumpre ho kuantidade ne’ebé hakerek iha Lista Kuantidade (BOQ). Tanba ne’e, ekipa husu ba kompaña atu halo reparasaun ba parte ne’ebé estraga, halo tratamentu ba parte ne’ebé hetan ferrujen no aplika pintura foun. Kompaña mós tenke kompleta servisu aterru rai nian tuir kuantidade no espesifikasaun téknika ne’ebé kontratu determina.

ADN, I.P subliña katak kompaña tenke hadi’a no kompleta servisu sira ne’ebé seidauk kumpre ho rekizitu kontratuál, molok prosesu pagamentu 100% bele hetan aprovasaun. Medida ne’e importante atu asegura kualidade obra, kumprimentu ba kontratu no utilizasaun osan públiku ho responsabilidade.

Liu husi inspesaun no monitorizasaun iha tereñu, ADN, I.P kontinua hala’o nia knaar atu asegura katak obra públika ezekuta tuir espesifikasaun téknika, kuantidade servisu no padraun kualidade ne’ebé determina iha kontratu.