Manufahi, 01/10/2026. Ekipa Ajénsia Dezenvolvimentu Nasionál Institutu Públiku (ADN,I.P) Munisípiu Manufahi, hamutuk ho ekipa Laboratóriu ADN,I.P no ekipa Ministériu Obras Públikas, hala’o atividade Teste Sand Cone ba kamada sub-base iha Projetu Reabilitasaun Estrada Nasionál Fatuberliu–Betano (Arterial A14), durante loron 30 Setembru to’o 01 Outubru 2026.

Atividade ne’e realiza hodi verifika densidade no grau kompaktasaun material sub-base ne’ebé aplika iha estrada leten, antes projetu tama ba faze konstrusaun tuir mai. Teste Sand Cone núdar métodu tékniku ida ne’ebé uza atu sukat densidade material iha kampu no asegura katak kompaktasaun material atinji nível ne’ebé rekere iha espesifikasaun téknika projetu.

Iha atividade ne’e, ekipa téknika halo teste iha pakote projetu tolu, ne’ebé inklui:

Pakote 3, husi Estasaun 15+000 to’o Estasaun 22+500, ne’ebé implementa husi Kompaña Linatet Unipesoál Lda ho montante kontratu hamutuk USD 3,757,483.31. Progresu fíziku projetu agora atinji 16.18%.

Enkuantu Pakote 4, husi Estasaun 22+500 to’o Estasaun 30+500, responsabiliza husi Kompaña Lizi Unipesoál Lda ho montante kontratu USD 3,669,237.29, no progresu fíziku atinji 15.01%.

Ba Pakote 5, husi Estasaun 30+000 to’o Estasaun 38+657.39, servisu implementa husi Kompaña Tinolina Unipesoál Lda ho montante kontratu USD 4,705,409.39, no progresu fíziku atinji ona 18.09%.

Teste no akompañamentu tékniku ne’e sai parte importante husi prosesu monitorizasaun infraestrutura, tanba kualidade kamada sub-base iha influénsia direta ba estabilidade no durabilidade estrada. Kompaktasaun ne’ebé la atinji padraun tékniku bele afeta kapasidade estrada atu simu karga tráfiku no bele hamosu problema iha superfísie estrada iha futuru.

Tanba ne’e, ADN,I.P liuhusi ekipa téknika no Laboratóriu, kontinua halo monitorizasaun no verifikasaun ba kualidade obra, inklui kontrolu material no prosesu konstrusaun, atu asegura implementasaun projetu tuir dezeñu tékniku, Kuantidade Obra (BoQ), espesifikasaun kontratu no padraun tékniku ne’ebé estabelese.

Projetu Reabilitasaun Estrada Nasionál Fatuberliu–Betano (Arterial A14) ne’e sai parte ida husi esforsu Governu atu hadi’a koneksaun rodoviária no kondisaun infraestrutura transporte, ne’ebé importante ba mobilidade komunidade, transporte produtu no atividade ekonomia iha Munisípiu Manufahi.