Díli, 23/10/2026. Ajénsia Dezenvolvimentu Nasionál, Institutu Públiku (ADN, I.P), liuhusi ekipa téknika iha munisípiu Viqueque, Covalima, Lautém no Bobonaro, kontinua hala’o monitorizasaun ba projetu infraestrutura, teste kualidade material konstrusaun no enkontru koordenasaun ho Ministériu Obras Públikas (MOP) no kompaña konstrusaun sira, atu asegura katak implementasaun projetu la’o tuir planu no espesifikasaun téknika ne’ebé determina.

Iha Munisípiu Viqueque, ekipa ADN, I.P hala’o monitorizasaun no teste rezisténsia kompresiva ba betãun ho rezisténsia 10 MPa iha Projetu Konstrusaun Sistema Irigasaun Irabere, ho númeru kontratu TENDER/026/MAPPF-2024 no montante kontratu USD 10,714,858.26. Projetu ne’e implementa husi kompaña Chongqing International Construction Corporation Co., Ltd. (CICO), ho KIAT núdar entidade supervizaun.

Iha munisípiu hanesan, ekipa ADN, I.P hamutuk ho Laboratóriu ADN, I.P hala’o monitorizasaun no teste ho humer test betãun ba estrutura baze estaka no parede abutment iha Projetu Konstrusaun Foun Ponte Sana. Projetu ne’e iha númeru kontratu TENDER/008/MOP-2024, ho montante kontratu USD 3,175,321.63, no implementa husi kompaña China MCC 20 Group Corp Ltd. Teste ne’e importante atu avalia kondisaun betãun iha elementu estrutura ponte nian.

Aleinde ne’e, ekipa ADN, I.P Munisípiu Viqueque, Laboratóriu ADN, I.P no MOP hamutuk hala’o teste preparatóriu iha tereñu ba argamassa iha Projetu Estrada Emerjénsia Larigutu–Uaguia, Tahagaba Dalirisi, Postu Administrativu Ossu. Projetu ne’e iha númeru kontratu SSS/089/MOP-2026, ho montante kontratu USD 3,052,575.69, implementa husi kompaña Walay Unipessoal, Lda no hetan finansiamentu husi Fundu Infraestrutura (FI).

Iha Munisípiu Lautém, ekipa ADN, I.P hala’o monitorizasaun ba Projetu Hadi’a no Mantein Estrada Lautém–Lospalos, iha trosu husi STA 00+060 to’o STA 28+040, ho narúk total 27,980 km. Projetu ne’e implementa husi kompaña Chongqing International Construction Corporation, ho númeru kontratu TENDER/177/MOP-2024 no montante kontratu USD 18,836,713.10. Monitorizasaun ne’e nia objetivu atu akompaña progresu servisu iha tereñu no verifika kumprimentu ba planu implementasaun no espesifikasaun téknika projetu nian.

Enkuantu iha Munisípiu Covalima, ekipa téknika munisipál hala’o enkontru ho ekipa téknika MOP ne’ebé destakadu iha munisípiu ne’e, atu hametin liña koordenasaun servisu, liuliu ba projetu sira iha Linha Ministerial (LM) ne’ebé progresu ezekusaun seidauk atinji nivel ne’ebé espera. Enkontru ne’e mós fó oportunidade ba ekipa téknika sira atu fó orientasaun ba kompaña konstrusaun sira, hodi aumenta ritmu servisu no hadi’a progresu implementasaun projetu.

Iha parte seluk, ekipa ADN, I.P Munisípiu Bobonaro hala’o enkontru ho ekipa MOP munisipál no kompaña Jiangsu Ruiwo Construction Group Co., Ltd. (Xina), kona-ba Projetu Reabilitasaun Estrada Munisipál, Seksaun A-16, husi Bobonaro to’o Lolotoe, ho distánsia 8.9 km. Projetu ne’e iha montante kontratu USD 11,979,891.30 no kobre trosu husi STA 0+000 to’o STA 8+900.

Enkontru ne’e foka ba aprezentasaun preparasaun husi kompaña no estabelesimentu liña koordenasaun entre ADN, I.P, MOP no kompaña atu fasilita komunikasaun, hametin kooperasaun no asegura katak implementasaun projetu la'o tuir planu servisu ne’ebé determina.

Liuhusi atividade monitorizasaun, teste kualidade material konstrusaun no enkontru koordenasaun ne’e, ADN, I.P kontinua hala’o nia knaar atu akompaña implementasaun projetu infraestrutura públika, hametin kontrolu kualidade no apoia ezekusaun projetu sira tuir espesifikasaun téknika no objetivu dezenvolvimentu nasionál.