Manatuto, 15/10/2026. Ekipa ADN, I.P Munisípiu Manatuto hala'o inspesaun ba pagamentu projetu konstrusaun Edifísiu Administrasaun Munisipál, ne'ebé kompaña JLC Unipesoál, Lda. mak implementa.

Inspesaun ne'e nia objetivu mak atu verifika no avalia servisu konstrusaun ne'ebé empreiteiru hala'o iha tereñu, hodi asegura katak progresu fíziku projetu ne'e tuir kontratu, espesifikasaun téknika no padraun kualidade ne'ebé determina.

Liuhusi inspesaun ne'e, ekipa ADN, I.P hala'o verifikasaun ba servisu ne'ebé empreiteiru ezekuta núdar baze ba prosesu pagamentu, hodi asegura katak pagamentu ne'ebé sei realiza reflete ho progresu servisu ne'ebé hala'o duni.

Atividade inspesaun ne'e importante atu hametin transparénsia, responsabilidade no kontrolu ba implementasaun projetu infraestrutura públika, nune'e investimentu Estadu bele utiliza ho efisiente no fó benefísiu ba administrasaun públika no komunidade.

ADN, I.P kontinua hala'o ninia knaar iha monitorizasaun no fiskalizasaun ba projetu infraestrutura públika, hodi asegura katak servisu konstrusaun sira hala'o tuir rekerimentu kontratuál no padraun tékniku ne'ebé aplika.