Baucau, 10/11/2026. Ekipa tékniku Ajénsia Dezenvolvimentu Nasionál, Institutu Públiku (ADN,I.P), Munisípiu Baucau, hala’o monitorizasaun ba projetu konstrusaun foun Edifísiu Sentru Formasaun São João Paulo II, Dioseze Baucau, ne’ebé Kompaña Cocactus Unipessoál, Lda mak implementa.

Monitorizasaun ne’e iha objetivu atu akompaña no avalia diretamente prosesu ezekusaun obra iha kampu, hodi asegura katak servisu konstrusaun hala’o tuir dezeñu tékniku, espesifikasaun kontratuál, padraun kualidade no prazu ezekusaun ne’ebé estabelese ona.

Liuhusi atividade monitorizasaun ne’e, ADN,I.P kontinua hala’o nia knaar institusionál atu asegura katak implementasaun projetu infraestrutura kumpre rekizitu tékniku no kualidade ne’ebé determina ona, nune’e investimentu ne’ebé realiza bele lori benefísiu ba utilizadór no komunidade.

Konstrusaun Sentru Formasaun São João Paulo II iha importánsia atu dezenvolve infraestrutura ne’ebé bele suporta atividade formasaun, aprendizajen no dezenvolvimentu kapasidade umana, liuliu ba benefisiáriu sira ne’ebé sei utiliza sentru refere.

ADN,I.P kontinua kompromete atu hala’o monitorizasaun no akompañamentu tékniku ho responsabilidade, profisionalizmu no transparénsia, hodi asegura katak projetu infraestrutura sira implementa tuir padraun tékniku no kontribui ba dezenvolvimentu sustentável iha Timor-Leste.