Bobonaro, 11/11/ 2026. Ajénsia Dezenvolvimentu Nasionál, Institutu Públiku (ADN, I.P), liuhusi ekipa téknika Munisípiu Bobonaro, hala’o monitorizasaun ba projetu konstrusaun foun edifísiu Eskuadra Polísia iha Balibó, ne’ebé implementa husi kompaña Fantija Unipessoal, Lda.

Monitorizasaun ne’e nia objetivu mak atu avalia diretamente progresu ezekusaun obra, kualidade servisu konstrusaun, kumprimentu ba dezeñu tékniku, espesifikasaun no padraun tékniku ne’ebé determina ona iha kontratu.

Atividade monitorizasaun ne’e importante atu asegura katak implementasaun projetu la'o tuir planu no padraun tékniku ne’ebé aprova ona, hodi garante kualidade obra no utilizasaun rekursu públiku ho responsabilidade.

ADN, I.P kontinua komprometida atu hametin monitorizasaun no supervizaun ba projetu infraestrutura públika sira iha territóriu nasionál, hodi asegura katak investimentu públiku bele kontribui ba hadi’a servisu públiku no dezenvolvimentu iha komunidade.