ADN RAEOA Hamutuk ho CNDG MPIE Akompaña Konstrusaun Estasaun GNSS no Monitoriza Progresu Konstrusaun Edifísiu UPF iha RAEOA
- Publika husi: Celso
- Loron: 19/Nov/2026
RAEOA, 19/11/2026. Ekipa Ajénsia Dezenvolvimentu Nasionál, Institutu Públiku (ADN, I.P) Rejiaun Administrativa Espesiál Oe-Cusse Ambeno (RAEOA), hamutuk ho ekipa CNDG-MPIE, hala’o akompañamentu ba atividade taka betãun ba sapatu fundasaun (Footing) iha projetu konstrusaun Estasaun GNSS CORS, ne’ebé lokaliza iha Fulolo, Postu Administrativu Pante Macassar, RAEOA.
Projetu ho naran New Construction of GNSS CORS Station and Supply, Installation, Testing and Commissioning of GNSS CORS Equipment iha Oecusse, Atauro, Ermera and Manatuto, projetu ne'e iha responsabilidade MPIE núdar na’in projetu, no implementa husi empreza Jolania Unipesoál Lda hamutuk ho PT GPSLand Indosolution.
Projetu ne’e iha durasaun kontratu fulan lima, ho montante kontratu hamutuk US$ 157,188.85, no tuir dadus atual, progresu fiziku projetu atinje ona 80%.
Akompañamentu ne’e iha objetivu atu asegura katak implementasaun servisu konstrusaun tuir projetu, dezeñu tékniku no padraun kualidade ne’ebé determina ona.
Iha atividade seluk, ekipa ADN, I.P RAEOA mós hala’o monitorizasaun ba projetu konstrusaun edifísiu Unidade Polísia Fronteira (UPF) iha Sakato, Suku Nipane, Postu Administrativu Pante Macassar, RAEOA.
Projetu ho naran New Construction of UPF Building iha Sakato , projetu ne’e Ministériu Interiór mak sai na’in no empreza Matlalan Unipesoál Lda mak implementadór.
Projetu ne’e hahú iha tinan 2025, ho durasaun kontratu fulan 12 no montante kontratu US$ 458,887.07. To’o monitorizasaun ne’e hala’o, progresu fiziku projetu rejista ona 79%.
Liuhusi atividade akompañamentu no monitorizasaun rua ne’e, ADN, I.P kontinua hala’o nia knaar institusionál atu asegura katak implementasaun projetu infraestrutura públika iha RAEOA lao tuir padraun tékniku, kualidade obra no dispozisaun kontratu ne’ebé vigora, hodi garante katak investimentu públiku bele fó benefísiu ba komunidade no dezenvolvimentu nasionál.
LEMA ADN
- Aprende hodi halo, halo hodi aprende;
- Haburas kreatividade no inovativo de servisu;
- Hametin principiu servisu salva an, salva superior/liders, salva instituisaun no salva nasaun;



