COVALIMA, 11/11/ 2026. Ajénsia Dezenvolvimentu Nasionál, Institutu Públiku (ADN, I.P), liuhusi ekipa téknika Munisípiu Covalima, hala’o monitorizasaun ba projetu konstrusaun infraestrutura públika ha’at iha Salele no Tilomar, Munisípiu Covalima. Projetu hirak ne’e implementa husi empreza konstrusaun ha’at, ho objetivu atu asegura kualidade no kumprimentu ba padraun tékniku iha prosesu ezekusaun obra.

Projetu dahuluk mak konstrusaun moru hale’u dormitóriu iha Uma Mahon Salele, ne’ebé implementa husi empreza Haburas Maukola Unipessoal, Lda.

Projetu daruak mak konstrusaun edifísiu Eskuadra Polísia iha Tilomar, ne’ebé implementa husi empreza Winto Unipessoal, Lda.

Projetu datoluk mak konstrusaun moru perimétriku, aterru rai no pavimentasaun ho betaun iha Postu Integradu Fronteira (PIF) Salele, ne’ebé implementa husi empreza Romante Unipessoal, Lda.

Projetu dahaat mak konstrusaun dormitóriu ba Postu Integradu Salele no Autoridade Alfándega iha PIF Salele, ne’ebé implementa husi empreza Charly Unipessoal, Lda.

Durante atividade monitorizasaun, ekipa téknika ADN, I.P hala’o observasaun no verifikasaun direta iha tereñu, atu avalia progresu fiziku obra, kualidade servisu no kumprimentu ba dezeñu, espesifikasaun téknika no kondisaun kontratu ne’ebé estabelese.

Monitorizasaun ne’e núdar parte husi responsabilidade ADN, I.P iha akompañamentu no avaliasaun ba implementasaun projetu investimentu públiku, hodi asegura katak obra sira ezekuta tuir padraun tékniku no rekizitu kontratu, no kontribui ba kualidade infraestrutura públika iha territóriu nasionál.

ADN, I.P kontinua hametin monitorizasaun ba implementasaun projetu investimentu públiku hodi promove kualidade, transparénsia no responsabilidade iha dezenvolvimentu nasionál.