Covalima, 10/11/2026. Ekipa tékniku husi Ajénsia Dezenvolvimentu Nasionál, Institutu Públiku (ADN, I.P), Munisípiu Covalima, hala’o monitorizasaun ba implementasaun Projetu Konstrusaun Foun Kazerna Polísia (New Construction of Bairos Policia) iha Orun, Ogues, Postu Administrativu Maukatar, Munisípiu Covalima.

Projetu ne’e ho montante kontratu hamutuk USD 3,767,106.21, ho durasaun implementasaun fulan 12, no progresu fíziku atúal to’o iha 1.03%.

Implementasaun projetu ne’e hala’o husi kompaña Jedelriva Unipessoal, Lda hamutuk ho PT. Candrawasih Abadi Makmur, núdar empreza konsórsiu (Joint Venture), ho Ministériu Interiór (MI) núdar na’in ba projetu. Projetu ne’e tama iha programa dezenvolvimentu infraestrutura ba tinan 2026.

Konstrusaun kazerna Polísia iha importánsia boot atu haforsa kapasidade institusionál no operasionál Polísia Nasionál Timor-Leste (PNTL), liuhusi fornese instalasaun no fasilidade adekuada ba membru polísia sira atu hala’o knaar loroloron. Kazerna ne’e mós sai núdar sentru operasionál ba organizasaun servisu, preparasaun no koordenasaun atividade seguransa.

Além ne’e, infraestrutura kazerna ne’ebé adekuada bele fasilita prontidaun membru polísia sira atu responde lalais ba kazu krime, konflitu no situasaun emerjénsia, hodi hametin manutensaun orden públika, protesaun sidadaun no seguransa komunidade iha área Maukatar no territóriu sira hale’u.

Ho dezenvolvimentu infraestrutura ne’e, espera katak PNTL bele aumenta efisiénsia prestasaun servisu ba públiku, hametin prezensa instituisaun seguransa iha komunidade no promove ambiente ne’ebé seguru ba atividade sosiál no ekonómika.

Monitorizasaun ne’ebé ADN, I.P hala’o iha objetivu atu akompaña no avalia progresu implementasaun projetu iha tereñu, hodi asegura katak servisu konstrusaun la'o tuir planu, prazu kontratu, espesifikasaun téknika no padraun kualidade ne’ebé determina iha dokumentu kontratu.

ADN, I.P kontinua hala’o knaar monitorizasaun ba projetu infraestrutura públika sira atu promove transparénsia, responsabilidade no kualidade iha ezekusaun orsamentu estadu, hodi asegura katak investimentu públiku fó benefísiu ba interese nasionál no komunidade.