VIQUEQUE, 10/11/2026. Ajénsia Dezenvolvimentu Nasionál, Institutu Públiku (ADN, I.P), liuhusi ekipa téknika iha Munisípiu Viqueque, hala’o inspesaun pagamentu ba Projetu Konstrusaun Foun Vedasaun no Estrutura Gabiaun iha Jardim Erois Uatulari, ne’ebé implementa husi Kompaña Hunter Construction, Lda.

Inspesaun ne’e iha objetivu atu halo verifikasaun direta ba servisu konstrusaun ne’ebé empreza ezekuta iha kampu, inklui kuantidade servisu, kualidade obra no kumprimentu ba espesifikasaun téknika, tuir termu no kondisaun kontratu, núdar parte husi prosesu avaliasaun pagamentu.

Ekipa téknika ADN, I.P hala’o inspesaun ne’e atu asegura katak servisu ne’ebé empreza aprezenta ba pagamentu koresponde ho servisu ne’ebé realiza duni iha kampu no kumpre padraun tékniku ne’ebé determina ona.

Projetu konstrusaun vedasaun no estrutura gabiaun iha Jardim Erois Uatulari iha importánsia atu hametin protesaun ba área Jardim Erois, hodi prevene risku estragu tanba erosaun rai no movimentu bee, nune’e mós ajuda mantein seguransa no konservasaun fatin ne’ebé iha valor istóriku no nasional.

Liuhusi inspesaun no monitorizasaun regular, ADN, I.P kontinua hala’o nia knaar institusionál atu asegura katak projetu infraestrutura públika ezekuta ho kualidade, transparénsia no responsabilidade, hodi garante katak investimentu públiku fó benefísiu ba interese públiku no dezenvolvimentu nasionál.