Covalima, 09/11/2026. Tékniku sira husi Ajénsia Dezenvolvimentu Nasionál, Institutu Públiku (ADN,I.P), ne’ebé destakadu iha Munisípiu Covalima, hala’o inspesaun pagamentu ba Projetu Reabilitasaun Estrada iha área fronteira entre Munisípiu Ainaro no Covalima, iha Estrada Zumalai, trosu Casa Fatuk Boot–Webaba, husi estasaun 7+000 to’o 13+086.

Projetu ne’e iha montante kontratu hamutuk USD 4,023,143.73 no implementa husi kompaña Kous Unipessoal, Lda parseria ho Aitula.

Inspesaun pagamentu ne’e nia objetivu mak atu verifika no avalia diretamente iha fatin implementasaun atu hatene progresu ezekusaun obra, kumprimentu ba espesifikasaun téknika, kualidade servisu no konformidade entre servisu ne’ebé realiza ho dokumentasaun pagamentu aprezenta.

Prosesu inspesaun ne’e importante atu asegura katak pagamentu ba implementador bazeia ba servisu ne’ebé implementa duni iha kampu no kumpre ho padraun no rekizitu tékniku kontratu nian.

Liuhusi atividade monitorizasaun no inspesaun hanesan ne’e, ADN,I.P kontinua hala’o nia knaar atu garante transparénsia, responsabilidade no efisiénsia iha jestaun implementasaun projetu infraestrutura públika, hodi asegura katak investimentu Estadu lori benefísiu ba komunidade.

Reabilitasaun estrada ne’e iha importánsia atu hadi’a kondisaun asesu ba transporte, fasilita movimentu ema no merkadoria, no hametin konektividade entre Munisípiu Ainaro no Covalima, liuliu ba komunidade sira ne’ebé uza dalan ne’e iha sira-nia atividade loroloron.