Ermera, 13/11/ 2026. Ekipa Ajénsia Dezenvolvimentu Nasionál, Institutu Públiku (ADN I.P), hamutuk ho ekipa Ministériu Obras Públikas (MOP), Ministériu Komérsiu no Indústria (MCI), konsultan fiskalizasaun no empreza hala’o inspesaun ba materiál konstrusaun ne’ebé importa husi Xina no feru armadu ba fundasaun ne’ebé instala ona iha fatin konstrusaun Projetu Konstrusaun Merkadu Munisípiu Ermera.

Inspesaun ne’e hala’o ho objetivu atu verifika konformidade no kualidade materiál konstrusaun ne’ebé importa husi Xina, no mós atu konfirma instalasaun feru armadu iha parte fundasaun kumpre ka lae padraun tékniku, dezeñu no espesifikasaun ne’ebé determina ona iha dokumentu kontratu.

Durante inspesaun, ekipa téknika sira fó atensaun ba kondisaun materiál konstrusaun no instalasaun feru armadu iha fundasaun, atu asegura katak prosesu implementasaun obra tuir rekizitu tékniku no padraun kualidade ne’ebé vigora.

Projetu Konstrusaun Merkadu Munisípiu Ermera ne’e implementa husi kompaña Henan Fifth Construction Group, Co. Ltd ho MCI núdar entidade na’in projetu.

Inspesaun ne’e sai parte ida husi responsabilidade ADN I.P hamutuk ho entidade relevante sira atu akompaña no kontrola kualidade implementasaun projetu infraestrutura públika, ho objetivu atu asegura katak obra ne’e kumpre padraun tékniku, espesifikasaun kontratu no kualidade ne’ebé determina ona, hodi garante seguransa no durabilidade infraestrutura ne’e ba utilizadór sira.