Baucau, 11/11/2026. Ajénsia Dezenvolvimentu Nasionál, Institutu Públiku (ADN, I.P), liuhusi ekipa téknika iha Munisípiu Baucau, hala’o monitorizasaun ba implementasaun Projetu Reabilitasaun Igreja São João Bosco, iha Suku Gariuai, Munisípiu Baucau, ne’ebé kompaña SKRaG Unipessoal, Lda.mak implementa.

Monitorizasaun ne’e nia objetivu atu haree no avalia diretamente progresu implementasaun obra iha kampu, asegura katak servisu konstrusaun la'o tuir projetu tékniku, espesifikasaun téknika no padraun kualidade ne’ebé estabelese ona.

Ekipa téknika ADN, I.P kontinua hala’o knaar monitorizasaun ho objetivu atu asegura transparénsia, responsabilidade no kualidade iha implementasaun projetu infraestrutura públika, hodi garante katak investimentu públiku fó benefísiu ba komunidade.

ADN, I.P kompromete nafatin atu hametin fiskalizasaun no monitorizasaun ba projetu dezenvolvimentu iha territóriu nasionál, hodi asegura ezekusaun obra ho kualidade, tuir padraun tékniku no fó impaktu pozitivu ba moris komunidade.