Díli, 06/11/2026. Koordenadora Unidade Jestaun Administrativa (UGA) Ajénsia Dezenvolvimentu Nasionál, I. P. (ADN), Sra. Amélia da Costa, hamutuk ho ekipa, reprezenta Diretór ADN, I.P hodi partisipa iha Selebrasaun Nasionál Tinan 50 ba Feto Timoroan Sira, ne’ebé hala’o iha Sentru Konvensaun Díli (CCD). Serimónia ne’e organiza husi Sekretaria Estadu ba Igualdade (SEI).

Selebrasaun ne’e nia objetivu mak atu hanoin no fó omenajen ba eroína Maria Tapo no feto-maluk sira ne’ebé sakrifika sira-nia moris iha luta ba ukun-rasik-an.

Komemorasaun Nasionál Feto Timoroan ba tinan 2026 ne’e hala’o ho tema “Feto Timor-Leste: Selebra Tinan 50 Igualdade no Inkluzaun”, no lema “Ami, Feto Timoroan Sira Sei Nunka Rende, Ami Sei Luta Nafatin atu Hetan Igualdade no Inkluzaun.”

Iha serimónia ne’e, Primeiru-Ministru Kay Rala Xanana Gusmão haktuir katak, maski feto Timoroan barak lakon sira-nia moris iha luta ba ukun-rasik-an, maibé sira nunka lakon fiar atu hetan independénsia. Tanba ne’e, obrigasaun ita hotu nian la’ós de’it atu fó omenajen ba feto sira ne’ebé mate ona, maibé liuliu atu fó oportunidade ba feto sira atu hala’o sira-nia papél iha área hotu-hotu. Nia mós enfatiza katak presiza hamenus violénsia doméstika no violasaun seksuál hasoru feto sira.

Prezidente Parlamentu Nasionál, Deputada Maria Fernanda Lay, iha nia intervensaun hateten katak feto Timoroan sira partisipa iha frente luta tolu, mak frente armada, klandestina no diplomátika, hodi hetan ukun-rasik-an.

Nia apela ba sosiedade atu kontinua luta ba igualdade jéneru, liuliu iha área rurál, atu feto sira bele foti desizaun rasik kona-ba sira-nia moris no mehi. Nia mós subliña katak igualdade entre feto no mane labele limita de’it ba dokumentu, maibé tenke aplika iha moris loroloron. Feto Timoroan sira la’ós de’it benefisiáriu hosi dezenvolvimentu nasionál, maibé tenke sai protagonista iha prosesu dezenvolvimentu Timor-Leste nian.

Aleinde ne’e, partisipante sira mós haree mensajen hosi Prezidente Repúblika, Dr. José Ramos-Horta, ne’ebé hato’o katak igualdade jéneru hahú hosi inan isin-rua, partu, edukasaun labarik sira nian to’o iha mundu servisu.

Prezidente Repúblika mós husu ba mane sira atu halo reflesaun no fó valor ba feto sira, tanba feto sira mak inan no feton ne’ebé iha kontribuisaun importante iha família no sosiedade.

Serimónia selebrasaun ne’e hetan partisipasaun hosi reprezentante Prezidénsia Repúblika, Governu, Parlamentu Nasionál, Órgaun Judisiál, veterana no veteranu sobrevivente sira, korpu diplomátiku, organizasaun feto sira, no grupu feto hosi munisípiu hotu-hotu.

(Media_ADN)