Covalima, 10/11/ 2026. Ekipa tékniku Ajénsia Dezenvolvimentu Nasionál, Institutu Públiku (ADN,I.P), destakadu iha Munisípiu Covalima, hala’o inspesaun téknika ba pedidu pagamentu 100% projetu konstrusaun moru protesaun Gabiaun, estrutura protesaun ho fatuk no bloku betaun, no estrada lokál iha Napol, Munisípiu Covalima.

Projetu ne’e ho naran Konstrusaun Moru Protesaun Gabiaun, Estrutura Protesaun ho Fatuk, Bloku Betãun no Estrada Lokál, estasaun 0+030 to’o 0+601.25, ho númeru kontratu SS/075/MOP-2025 no montante kontratu hamutuk USD 1,601,691.41. Kompaña Tofranditar, Unipessoal, Lda mak responsabiliza ba implementasaun projetu ne’e.

Durante inspesaun iha tereñu, ekipa tékniku ADN,I.P halo verifikasaun ba íten servisu sira ne’ebé empreza aprezenta atu prosesu pagamentu, ho fokus ba servisu konstrusaun estrada lokál no estrutura protesaun.

Ba servisu estrada lokál, ekipa tékniku verifika íten aterru ho rai komún no aterru ho materiál hili, atu haree kumprimentu ba kuantidade no espesifikasaun téknika ne’ebé hakerek iha dokumentu kontratu.

Aleinde ne’e, ekipa tékniku mós halo verifikasaun ba estrutura protesaun ne’ebé uza bloku betaun, ho kuantidade hamutuk 356 unidade, núdar parte ida husi servisu konstrusaun atu hametin protesaun infraestrutura iha área refere.

Inspesaun téknika ne’e nia objetivu atu konfirma kuantidade no ezekusaun servisu iha tereñu, kompara ho dokumentu no íten servisu ne’ebé empreza submete, antes kontinua prosesu administrativu ba pagamentu 100%, tuir kondisaun kontratu no prosedimentu tékniku ne’ebé vigora.

Protesaun infraestrutura liuhusi konstrusaun moru Gabiaun, estrutura ho fatuk, bloku Betãun no estrada lokál iha importánsia atu hametin estabilidade rai, hamenus risku estragu tanba bee no erosaun, no hadi’a asesu ba komunidade iha área Napol.

Liuhusi inspesaun no akompañamentu tékniku ba projetu infraestrutura públika, ADN,I.P kontinua hala’o ninia knaar atu asegura katak ezekusaun projetu sira kumpre padraun tékniku, kualidade servisu no kondisaun kontratu, hodi garante utilizasaun rekursu Estadu nian ho responsabilidade, efisiénsia no transparénsia.