Bobonaro, 10/11/2026. Ekipa tékniku Ajénsia Dezenvolvimentu Nasionál, Institutu Públiku (ADN.I.P), hamutuk ho ekipa tékniku Ministériu Obras Públikas (MOP), ne’ebé destakadu iha Munisípiu Bobonaro, hala’o enkontru ho reprezentante Kompaña Dany Star, Unipesoál Lda., atu ko’ordena no diskute kona-ba preparasaun no implementasaun Projetu Reabilitasaun Estrada Lokál ho métodu Fiber Reinforced Concrete (FRC), iha Marobo, ho narúk 5,325 km, husi Estasaun 0+000 to’o Estasaun 5+325.

Enkontru ne’e iha objetivu atu hametin koordenasaun entre MOP, ADN.I.P no empreza hodi asegura katak prosesu implementasaun projetu la'o tuir planu no kumpre padraun tékniku no kualidade ne’ebé determina ona.

Iha enkontru ne’e, Kompaña Dany Star halo apresentasaun kona-ba projetu, no kontinua ho diskusaun kona-ba estabelesimentu liña koordenasaun entre MOP, ADN.I.P no empreza, atu fasilita komunikasaun, supervizaun no rezolusaun dezafiu sira durante ezekusaun obra.

Projetu ne’e ho númeru kontratu SSS/174/MOP-2026, ho montante kontratu hamutuk US$ 1,024,261.84, no implementa husi Kompaña Dany Star, Unipesoál Lda.

ADN.I.P, liuhusi ekipa tékniku munisipál, kontinua hala’o knaar monitorizasaun no akompañamentu ba projetu infraestrutura públika, atu asegura kumprimentu ba espesifikasaun téknika, kualidade obra no utilizasaun rekursu públiku ho responsabilidade.