Ermera, 06/11/2026. Ajénsia Dezenvolvimentu Nasionál, Institutu Públiku (ADN, I.P), liuhusi ekipa téknika ne’ebé destakadu iha Munisípiu Ermera, hala’o inspesaun pagamentu IPCa.01 ba implementasaun projetu konstrusaun Moru Protesaun Cyclop Talimoro Downstream Left Side Type B, iha Estasaun 0+440 to’o 0+889, Package V, Suku Talimoro, Postu Administrativu Ermera, Munisípiu Ermera.

Projetu ne’e implementa husi Kompaña Lecha Liang Pacific, Lda., ho Númeru Kontratu MOP-EO-26039 no valor kontratu USD 408,086.68.

Inspesaun pagamentu ne’e nia objetivu mak atu halo verifikasaun direta iha kampu kona-ba progresu fíziku servisu sira ne’ebé implementa ona, kualidade servisu, konformidade ho dezeñu no espesifikasaun téknika, utilizasaun materiál konstrusaun, no kumprimentu ba termu no kondisaun kontratu.

Durante atividade ne’e, ekipa téknika ADN, I.P halo observasaun no verifikasaun ba servisu sira ne’ebé kompaña implementadór hala’o ona, inklui kontinuidade servisu foku betaun (concrete pouring) ba konstrusaun moru protesaun Cyclop.

Bazeia ba rezultadu inspesaun iha kampu, ekipa téknika ADN, I.P identifika katak implementasaun servisu sira la'o tuir progresu ne’ebé planeadu. Tanba ne’e, ADN, I.P. fó orientasaun no rekomendasaun téknika ba kompaña implementadór atu hadi’a no asegura katak prosesu konstrusaun kontinua tuir planu servisu, dezeñu, espesifikasaun téknika no padraun kualidade ne’ebé estabelese ona iha dokumentu kontratu.

Inspesaun pagamentu hanesan parte importante husi responsabilidade ADN, I.P atu asegura transparénsia no akuntabilidade iha jestaun implementasaun projetu públiku, no garante katak pagamentu ne’ebé realiza bazeia ba servisu ne’ebé implementa duni iha kampu, tuir kualidade no kondisaun kontratu.

Moru protesaun Cyclop ne’e iha importánsia atu hamenus risku estragu ne’ebé kauza husi erosaun, bee mota no impaktu korrente bee ba área besik, nune’e bele proteje infraestrutura no propriedade komunidade iha área ne’e.