LAUTÉM,10/11/2026. Ekipa tékniku Ajénsia Dezenvolvimentu Nasionál, Institutu Públiku (ADN,I.P), iha Munisípiu Lautém, hala’o monitorizasaun ba projetu infraestrutura ha’at ne’ebé iha hela prosesu konstrusaun no reabilitasaun iha Postu Administrativu Lospalos.

Projetu dahuluk mak konstrusaun foun bairus Polísia Nasionál Timor-Leste (PNTL) iha Lospalos, ne’ebé implementa husi Kompaña Incanto Weste Unipessoal, Lda.

Projetu daruak mak konstrusaun Uma Dignu ba Povu iha Pehefito, Suku Muapitine, Lospalos, ne’ebé implementa husi Kompaña Zyahfast Unipessoal, Lda. Projetu ida-ne’e iha objetivu atu kontribui ba hadi’a kondisaun hela-fatin no promove moris di’ak ba komunidade.

Aleinde ne’e, ekipa ADN,I.P mós hala’o monitorizasaun ba Projetu Reabilitasaun Sentru Kultural Lospalos, ne’ebé implementa husi Kompaña Valcander Unipessoal, Lda. Reabilitasaun sentru kultural ne’e importante atu mantein no hadi’a infraestrutura ne’ebé suporta atividade kulturál, promove identidade no preserva patrimóniu kulturál komunidade.

Projetu ikus mak Konstrusaun Foun Igreja Paróquia São Paulo Lospalos, ne’ebé implementa husi Kompaña Jenic Enterprises Unipessoal, Lda. Infraestrutura relijioza ne’e iha knaar importante atu suporta atividade pastorál, hametin moris relijioza no promove unidade entre fiar-na’in sira.

Liuhusi monitorizasaun ne’e, ADN,I.P kontinua hala’o nia responsabilidade atu akompaña implementasaun projetu sira iha tereñu, haree progresu servisu konstrusaun no asegura katak ezekusaun obra tuir dezeñu, espesifikasaun téknika, padraun kualidade no kondisaun kontratu ne’ebé estabelese.

ADN,I.P reafirma nia kompromisu atu kontinua hala’o monitorizasaun no akompañamentu ba projetu dezenvolvimentu iha munisípiu sira, ho objetivu atu asegura katak investimentu públiku ezekuta ho responsabilidade, transparénsia no kualidade, hodi produz benefísiu ba komunidade.