Lospalos, 11/11/2026. Ajénsia Dezenvolvimentu Nasionál, Institutu Públiku (ADN, I.P), liuhusi ekipa téknika Munisípiu Lautém, hala’o atividade monitorizasaun ba implementasaun projetu Hadia no Hametin Sistema Abastesimentu Bee Moos iha Lospalos (Konsulta I), ne’ebé implementa husi empreza Beijing Urban Construction Group Co. Ltd.

Atividade monitorizasaun ne’e nia objetivu atu akompaña no avalia diretamente prosesu implementasaun obra iha kampu, hodi asegura katak servisu konstrusaun lao tuir dezeñu tékniku, espesifikasaun kontratuál, padraun kualidade no kalendáriu ezekusaun ne’ebé determina ona.

Liuhusi monitorizasaun ne’e, ADN, I.P hala’o nia knaar institusionál atu asegura katak implementasaun projetu infraestrutura públika kumpre ho padraun tékniku no prinsipiu responsabilidade iha jestaun investimentu públiku.

Projetu sistema abastesimentu bee moos ne’e iha importánsia estratéjika ba hadi’a asesu komunidade sira iha Sidade Lospalos ba bee moos, no kontribui diretamente ba hadi’a kondisaun saúde públika, saneamentu no kualidade moris populasaun.

ADN, I.P kontinua kompromete atu hala’o monitorizasaun no akompañamentu regulár ba projetu dezenvolvimentu nasionál, hodi asegura katak investimentu Estadu implementa ho kualidade, transparénsia no responsabilidade, atu fó benefísiu real ba povu.