Manufahi,11/11/2026. Ajénsia Dezenvolvimentu Nasionál, Institutu Públiku (ADN, I.P), liuhusi ekipa téknika Munisípiu Manufahi, kontinua hala’o atividade akompañamentu, monitorizasaun no inspesaun ba implementasaun projetu infraestrutura públika iha territóriu Munisípiu Manufahi.

Iha atividade ida-ne’e, ekipa ADN Munisípiu Manufahi akompaña ekipa Laboratóriu ADN, I.P no ekipa téknika Ministériu Obras Públikas (MOP), hamutuk ho reprezentante projetu na’in IGEADI, I.P foti amostra betaun ba elementu konstrusaun sloof (baldrame) iha projetu konstrusaun foun alojamentu, área estasionamentu no seguransa iha Dotik, Manufahi. Projetu ne’e implementa husi kompanhia ASBALAN Unipesoál Lda.

Aleinde ne’e, ekipa ADN Munisípiu Manufahi hala’o monitorizasaun ba projetu konstrusaun Edifísiu Klínika Wedauberec, ne’ebé lokaliza iha Suku Mahaquidan, Postu Administrativu Alas, Munisípiu Manufahi. Projetu ne’e implementa husi kompanhia WA'IKBATARA Unipesoál Lda. Monitorizasaun ne’e iha objetivu atu akompaña progresu implementasaun obra no asegura katak servisu konstrusaun lao tuir padraun tékniku no espesifikasaun kontratu.

Iha Dotik, ekipa ADN mós hala’o monitorizasaun ba projetu konstrusaun foun arame taka rai ba edifísiu eskritóriu IGEADI, I.P. Projetu ne’e implementa husi kompanhia LUCKY STRYKE Unipesoál Lda.

Enkuantu ne’e, ekipa ADN Munisípiu Manufahi hala’o inspesaun ba prosesu pagamentu projetu konstrusaun Uma Dignu, ne’ebé implementa husi kompanhia ELIEZER sosiu AIMEN Unipesoál Lda. Inspesaun ne’e atu verifika no konfirma servisu konstrusaun ne’ebé kompaña ezekuta iha tereñu, hanesan baze importante antes prosesu pagamentu tuir prosedimentu kontratu.

Liuhusi atividade sira-ne’e, ADN, I.P reafirma nia kompromisu atu kontinua hala’o akompañamentu, monitorizasaun no kontrolu ba implementasaun projetu infraestrutura públika, hodi asegura kualidade servisu, kumprimentu ba padraun tékniku, transparénsia no responsabilidade iha utilizasaun rekursu públiku, atu infraestrutura ne’ebé harii bele fó benefísiu ba komunidade.