Ermera, 09/11/2026. Ekipa téknika Ajénsia Dezenvolvimentu Nasionál, Institutu Públiku (ADN, I.P) Munisípiu Ermera, hamutuk ho ekipa Laboratóriu ADN, I.P, ekipa MCI núdar na’in ba projetu, konsultór no kontratór, hala’o teste ba besi Anchor iha Laboratóriu Universidade Nasionál Timor Lorosa’e (UNTL), Hera, Dili.

Teste ne’e hala’o núdar parte ida husi prosesu kontrolu no garantia kualidade ba Projetu Konstrusaun Merkadu Munisipál Ermera, ne’ebé implementa hela husi kontratór HENAN FIFTH CONSTRUCTION GROUP Co Ltd.

Teste ba besi Anchor importante tebes atu verifika nia rezisténsia no kualidade tuir espesifikasaun téknika no padraun konstrusaun ne’ebé determina ona. Rezultadu teste ne’e sei sai baze téknika ida atu asegura katak materiál ne’ebé uza iha konstrusaun kumpre kritériu seguransa no kualidade, hodi garante durabilidade no estabilidade infraestrutura nian.

Iha atividade seluk, ekipa ADN Munisípiu Ermera, hamutuk ekipa husi Ministériu Interiór ne'ebé maka núdar na’in ba projetu, hala’o akompañamentu ba servisu fundasaun no konkretajen ba estrutura kakuluk iha Projetu Konstrusaun Foun Eskuadra Hatulia, ne’ebé implementa hela husi SWERTE PERA Unipessoal, Lda.

Akompañamentu ne’e importante atu asegura katak ezekusaun obra hala’o tuir dezeñu tékniku, espesifikasaun kontratuál no padraun kualidade ne’ebé aprova ona, hodi garante seguransa, estabilidade no durabilidade edifísiu nian.

Liuhusi atividade monitorizasaun, inspesaun no kontrolu kualidade hanesan ne’e, ADN, I.P kontinua hala’o nia responsabilidade institusionál atu asegura implementasaun projetu infraestrutura públika sira tuir padraun tékniku, kualidade no transparénsia, ho objetivu atu garante katak investimentu públiku fó benefísiu ba komunidade no dezenvolvimentu nasionál.