VIQUEQUE, 06/11/2026. Ekipa téknika Ajénsia Dezenvolvimentu Nasionál, Institutu Públiku (ADN,I.P), iha Munisípiu Viqueque, hala’o inspesaun téknika ba pedidu IPC 03 no IPC 04, ba projetu rua (2) reabilitasaun estrada rural Ossu de Cima–Liaruca, ho objetivu atu verifika progresu no kualidade servisu ne’ebé empreiteiru sira ezekuta iha terrenu.

Inspesaun ne’e kobre trosu estrada rua, mak trosu Sta. 8+000 to’o Sta. 10+000, ho pedidu pagamentu IPC 03, no trosu Sta. 10+000 to’o Sta. 12+000, ho pedidu pagamentu IPC 04.

Ba trosu primeiru, projetu ne’e iha númeru kontratu MPW-W-240118, ho montante kontratu USD 463,826.39, ne’ebé implementa husi empreiteiru Metaqueli Unipesoál Lda. Enkuantu trosu daruak, ho númeru kontratu MPW-W-240117, iha montante kontratu USD 489,147.85, ne’ebé implementa husi empreiteiru Larawulo Unipesoál Lda.

Inspesaun ne’e importante atu konfirma katak volume servisu ne’ebé empreiteiru sira aprezenta iha pedidu pagamentu koresponde ho servisu ne’ebé ezekuta duni iha kampu, no kumpre ho espesifikasaun téknika, padraun kualidade no kondisaun kontratu.

Reabilitasaun estrada rural Ossu de Cima–Liaruca espera bele hadi’a asesibilidade no konektividade entre komunidade sira, fasilita transporte ema no produtu agríkola, no promove asesu ba servisu báziku no atividade ekonómika iha área rurál.

Liuhusi inspesaun no monitorizasaun sistemátika, ADN,I.P hala’o nia knaar institusionál atu akompaña implementasaun projetu infraestrutura públika, hodi promove transparénsia, responsabilidade no kumprimentu ba padraun tékniku iha utilizasaun rekursu públiku.