Bobonaro, 10/11/2026. Ekipa tékniku husi Ajénsia Dezenvolvimentu Nasionál Institutu Públiku (ADN,I.P) destakadu iha Munisípiu Bobonaro hala’o atividade monitorizasaun ba projetu konstrusaun foun kazerna Polísia Nasionál Timor-Leste (PNTL), ne’ebé lokaliza iha Postu Administrativu Cailaco, Munisípiu Bobonaro.

Projetu ne’e implementa husi konsórsiu Kompaña Lica-Tada Unipesoál, Lda hamutuk ho Always Construction Unipesoál, Lda.

Atividade monitorizasaun ne’e nia objetivu mak atu asegura katak prosesu implementasaun projetu la'o tuir dezeñu tékniku, espesifikasaun kontratuál, padraun kualidade no prazu ezekusaun ne’ebé determina ona.

Ekipa ADN,I.P kontinua hala’o kontrolu no akompañamentu tékniku durante prosesu konstrusaun, atu identifika no prevene irregularidade sira ne’ebé bele afeta kualidade no durabilidade infraestrutura.

Konstrusaun kazerna foun PNTL iha Cailaco iha importánsia boot atu suporta servisu institusionál polísia, liuliu hodi hadi’a kondisaun servisu, alojamentu no fasilidade operasionál ba membru PNTL sira. Infraestrutura ne’e mós kontribui atu hametin kapasidade institusionál no hadi’a prestasaun servisu seguransa públika ba komunidade iha Munisípiu Bobonaro.

ADN,I.P hanesan instituisaun ne’ebé iha responsabilidade atu halo monitorizasaun no avaliasaun ba projetu dezenvolvimentu nasionál, kontinua kompromete an atu asegura implementasaun projetu públiku sira tuir prinsipiu transparénsia, responsabilidade no kualidade.