Alas, 11/11/2026. Ekipa téknika Ajénsia Dezenvolvimentu Nasionál, Institutu Públiku (ADN,I.P), hala’o monitorizasaun no enkontru koordenasaun ho empreza CNI22 Construction Co. Ltd (Xina) no konsultór supervizaun Wesitan-KWK , kona-ba implementasaun Projetu Reabilitasaun Estrada Munisipál (Estrada Coletora C28) Dotik–Fatuberliu–Alas, ho naruk total 16,25 km no valór kontratu USD 15.396.441,99.

Enkontru ne’e foka ba avaliasaun aspetu tékniku no operasionál sira ne’ebé relasiona ho implementasaun projetu, liuliu kona-ba fonte no utilizasaun materiál rai ba aterru, materiál ne’ebé sei utiliza ba kamada baze sekundária estrada, disponibilidade ekipamentu no traballadór sira iha fatin projetu, avansu fiziku konstrusaun, no problema sira ne’ebé empreza hasoru durante prosesu implementasaun obra iha tereñu.

Diskusaun ne’e mós sai núdar oportunidade ba parte hotu atu troka informasaun, identifika dezafiu sira no buka solusaun téknika apropriada, hodi nune’e prosesu implementasaun projetu bele la'o ho di’ak no tuir padraun tékniku ne’ebé determina ona.

Liuhusi atividade monitorizasaun no koordenasaun ne’e, ADN,I.P kontinua hala’o ninia responsabilidade atu akompaña no monitoriza implementasaun projetu infraestrutura públika, ho objetivu atu asegura kualidade obra, kumprimentu ba espesifikasaun téknika no utilizasaun rekursu públiku ho responsabilidade.